Поранешен американски амбасадор во Приштина вработен во компанијата за која лобиралПриштина, 15 април 2014 (МИА) – Поранешниот американски амбасадор во Приштина Кристофер Дел доби вработување во компанијата Бехтел Корпорејшн, која како што објави приштински Експрес, помагала да се склучи договор вреден 820 милиони евра за градење на автопатот што го поврзува Косово со Албанија.
Дел ќе биде менаџер на таа фирма за Африка, а ангажманот го добил само неколку месеци откако ја завршил тридецениската кариера во Стејт департментот.
Весникот потсетува дека детали од договорот никогаш не се објавени и оти високиот европски дипломат Питер Феит во 2010 година кога се потпишал договорот, барал истрага и остро критикувал што американскиот дипломат лобирал за таа компанија. Феит го обвини Дел дека скрил информации за детали за договорот со компанијата Бехтел, кој е прифатен без образложение, потпишан под притисок и кој го оптоварил буџетот на Косово.
|