Белград, 16 април 2014 (МИА) - Еден ден пред одржувањето на изборите во Србија на 15 март оваа година, во Рударско-топилничарскиот базен Бор (РТБ Бор) постојан работен однос добија 500 работници, пишува денеска српскиот весник „Блиц“.
РТБ Бор веќе со години е компанија во реструктуирање, законот ја штити од какви било принудни наплаќања, „и прогледува низ прсти“ поради неплатените придонеси и ја покрива оваа обврска кон пет илјади работници од буџетот, додава „Блиц“ во текстот насловен како „Директорот Благоја Спасковски прима нови работници, државата за нив плаќа придонеси“.
РТБ Бор, истакнува весникот, како ниту другите фирми во реструктуирање, не можат да вработуваат без согласност на Агенцијата за приватизација, но Спасковски ја нема таа согласност.
Поради оваа незаконска активност досега не е поднесена ниту една пријава против раководството на РТБ Бор, но изминатите три години против челниците на претпријатието се поднесени повеќе од 20 кривични пријави за злоупотреба на службената должност.