Стразбур, 16 април 2014 (МИА) - Жозеп Дол, претседателот на најголемата политичка група во Европскиот парламент – Народните партии, во денешното интервју за стразбуршкиот дневен весник „ДНА“ ги предупредува идните европратеници дека треба да ја преземат одговорноста за Балканот, поучени од она што се случува во Украина, пренесува дописникот на МИА од Стразбур.
- Тие (идните европратеници) набрзо треба да станат свесни со она што се случува во Украина. И исто така на Балканот! На Балканот е експлозивно! - вели Жозеп Дол.
- Ако не се воспостави правната држава таму, ќе продолжи големиот бандитизам, олигархијата и корупцијата. Тоа е невозможно да се контролира. Ако тоа продолжи, таму ќе ни се случи револуција и се надевам дека нема да има војна, со жалење констатира францускиот европратеник.
- Ова ни го кажа многу јасно на крајот од март американскиот претседател Обама кога дојде во Брисел: - Балканот е проблем на Европа, а не на САД“, додава тој.
Жозеп Дол се откажува од мандатот на европратеник, но тој останува во политиката како претседател на Европските народни партии.