Анкара, 16 април 2014 (МИА) - Бројот на сириски бегалци во Турција е над 900.000, соопшти турската Дирекција за управа при катастрофи и вонредни состојби.
Началникот на дирекцијата Фуат Октај истакна дека бројот на бегалци од Сирија, сместени во бегалски кампови, е 224.000. Тој изјави дека во бегалските кампови нема проблеми, но напорите на дирекцијата во моментот се насочени кон потребите на бегалците надвор од камповите.
Октај рече дека повеќето сириски бегалци живеат во турските окрузи што се граничат со Сирија.
Меѓународната помош, која досега ни беше одделена за сириските бегалци, изнесува 200 милиони долари, а Дирекцијата за управа при катастрофи и вонредни состојби потрошила 2,5 милијарди долари, рече Октај.
Тој ја повика меѓународната заедница за поголема соработка во однос на проблемите со сириските бегалци.