Приштина, 22 јули 2014 (МИА) - Главниот обвинител Клинт Вилијамсон најде докази за воените злосторства против поранешните припадници на Ослободителната војска на Косово, но не и доволно докази дека во Косово имало трговија со органи, објави денеска приштинскиот весник „Коха диторе“.
Најмалку десет поранешни припадници на ОВК ќе бидат обвинети за воени злосторства за злосторства против цивилите.
Весникот наведува дека припадниците на ОВК ќе бидат покренати обвиненија и за исчезнување на голем број Срби од Зочишта и Ораховец, а за одговорни се сметаат и двајца високи офицери од ОВК.
Вилијамсон вчера ги претстави доказите пред косовските власти. Обвиненијата опфаќаат убиства на цивили, злоставување и нивно држење во нечовечки услови, но не и трговија со органи.
Се очекува припадниците на ОВК да бидат обвинети за поединечна, но не и за командна одговорноста, поради што би бил ослободен од одговорноста и премиерот Хашим Тачи.
Резултатите од тригодишната истрага шефот на Специјалниот истражен оперативен тим (СИТФ), обвинителот Клинт Вилијамсон ги претстави пред министрите за правда Хајредин Кучи, за внатрешни работи Бајрам Реџепи и за безбедносните сили Агим Чеку.
Вилијамсон вчера во Приштина се сретна и со претседателката на Косово, Атифете Јахјага, но не и со Тачи.
Извештајот на меѓународни истражители треба да биде објавен во текот на следната недела во Брисел.