Софија, 22 јули 2014 (МИА) - Бугарската Влада на премиерот Пламен Орешарски, би можела да поднесе оставка по нејзината утрешна седница, соопшти денеска потпреседателот на Народното собрание на Бугарија, Маја Манолова.
Како што јави БТА, претходно извори во двете владејачки партии - Бугарската социјалистичка партија (БСП) и Движењето за права и слободи (ДПС) потврдиле дека Владата ќе поднесе оставака до крајот на оваа недела.
Најавата за оставка на Владата уследи откакао денеска не се одржаа најавените политички консултации во бугарскиот Парламент, затоа што на нив не се појавија пратениците на опозициската партија Граѓани за европски развој на Бугарија (ГЕРБ).
Манолова најави дека и покрај денешните неуспешни консулатации, најдоцна до 5 август ќе се одржи седница на Собранието на кое ќе биде донесена одлука за негово распуштање, со цел, согласно претходно постигнатиот договор, предвремените парламентарни избори да се одржат на 5 октомври.
Последните парламентарни избори во Бугарија се одржаа лани во мај.