И „Српска“ поставува услови

Приштина, 22 јули 2014 (МИА) - По движењето „Самоопределување“, и изборната листа „Српска“, и постави услови на трипартиската коалиција за формирање на идната косовска Влада, но со поинакви барања, пишува денеска приштинскиот весник „Коха диторе“.

Постојат два основни услова, како што ги нарекуваат, за оваа  партија да гласа за новата косовска Влада. Тоа се итно формирање на Заедницата на српски општини на Косово и неспроведување на приватизацијата на претпријатијата што се наоѓаат во српските општини, меѓу кои и комбинатот „Трепча“ и „Брезовица“, наведува весникот.

Претседателот на листата „Српска“, Александар Јаблановиќ, како останати услови ги спомена и враќањето на имотот на Српската православна црква во Косово, како и овозможување услови на итно враќање на сите раселени косовски Срби.

Кандидатот за премиер на трипартиската коалиција, што ја сочинуваат Демократскиот сојуз на Косово (ЛДК), Алијансата за иднината на Косово (ААК) и Иницијативата за Косово, Рамуш Харадинај, негираше дека српската партија поставувала услови, нагласувајќи дека таа соработува со новото парламентарното мнозинство.

Харадинај притоа се изјасни за обновување на преговорите со движењето „Самоопределување“.

- Можеме да се вратиме на овие преговори бидејќи тие како и формирањето влада се во интерес на сите нас, односно на целиот албански политички спектар, вклучувајќи го и  „Самоопределување“, рече Харадинај по состанокот со новозибраниот претседател на косовското Собрание, Иса Мустафа.