Четирикратно убиство и самоубиство во Албанија Тирана, 22 јули 2014 (МИА) - Албанската јавност денеска ја вознемири четиркратно убиство на членови на едно семејство во селото Сук кај градот Фиер, јави дописникот на МИА.
Седумдесет и тригодишен жител на селото со ловечка пушка ги усмртил неговите двајца браќа, кои биле на возраст од 69 и 60 години, и 43-годишната сопруга и 17-годишната ќерка на едниот од нив, а потоа се самоубил.
Според полициски извори, старецот прво ги убил своите двајца браќа во дворот на куќата, а потоа во нивниот дом и снаата и внуката. Со ловечката пушка во рака излегол од дома и во блиската нива засадена со пченка се самоубил.
Масакрот бил поттикнат од противењето на убиецот покојната внука да се сврши со едно локално момче, кое не било по негова волја. Свршувачката била закажана за денеска.
За неполн месец ова е трета ваква семејна трагедија во Албанија. Прво, во селото Грете кај Тирана, шеесетгодишен маж си ја застрела сопругата и родениот брат, па се самоуби, а потоа, мајка се самоуби откако ја уби петнаесетгодишната ќерка.
|