Анкара, 22 јули 2014 (МИА) - Турскиот премиер Реџеп Тајип Ердоган призна дека во последно време не одржува директна комуникација со американскиот претседател Барак Обама.
- Претходно јас му се јавував директно. Но, бидејќи не можам да ги постигнам очекуваните резултати за Сирија, сега нашите министри за надворешни работи разговараат меѓу себе. Јас зборувам со потпретседателот Џо Бајден, изјави Ердоган во телевизиско интервју.
Обама и Ердоган често водеа телефонски разговори за надворешно-политички прашања, посебно на почетокот на Арапската пролет. Последниот телефонски разговор меѓу нив двајца беше на 20 февруари, по што Белата куќа објави демант на пренесената содржина од разговорот од страна на турскиот премиер.
Ердоган во изминатиот период ги заостри изјавите против политиката на САД во врска со Египет, Сирија и израелско-палестинскиот конфликт, објаснувајќи дека не може да го разбере ставот на Вашингтон кон овие прашања.