Сараево, 24 јули 2014 (МИА) - Податоците за тоа колку БиХ на неодамнешната донаторска конференција во Брисел добила донации, а колку кредити, треба да бидат познати до крајот на неделава, изјави шефот на делегацијата на ЕУ во БиХ, Петер Соренсен, додавајќи дека приоритети се обновување на работните места и домовите на настраданите во мајските поплави.
- Како некој што ги спроведува проектите овде, не би бил резервиран кон она што пристигна од Брисел. Кредитите се многу поволни, со ниска каматна стапка, верувам дека тоа е околу два отсто, и со подолг грејс период, истакна Соренсен.
Тој нагласи дека може да зборува само во име на Унијата, а што се однесува до другите донатори и кредитодаватели, тие ќе го определат начинот и темпото на доставување на парите.
- Нашите проекти во најголема мерка се реализираат по пат на ИПА фондовите. Станува збор за некои 85 милиони евра... Работиме на тоа со кого ќе ги спроведеме започнатите проекти и како. Што се однесува до кредиторите, верувам дека и тие брзо ќе ги испратат своите пари и со властите во БиХ ќе го договараат начинот на имплементирање, објасни европскиот претставник.