Анкара, 28 јули 2014 (МИА) - Една жена треба да ја запази моралната пристојност и не треба гласно да се смее пред други луѓе, изјави турскиот вицепремиер Булент Аранч, предизвикувајќи денеска бурни реакции во земјата.
- Мажот треба да е морален, жената исто така. Таа треба да знае што е пристојно, а што не. Жената не треба да се смее гласно пред сите, туку треба да биде пристојна во секој момент, истакна вчера Аранч за време на предизборната кампања во Бурса.
Ваквата забелешка предизвика остри реакции на социјалните мрежи. Интернет корисниците го критикуваа „се поголемото мешање“ на турската власт во приватниот живот на граѓаните.
- Престанете да ни давате лекции за морал. Наместо тоа дајте отчет за парите кои ги украдовте, напишал еден корисник на Твитер.
Екмеледин Ихсаноглу, кандидатот за претседател на Републиканската народна партија (ЦХП) и на Партијата на националистичкото движење, во коментар на Твитер напиша: „Ние навистина имаме потреба да го слушаме веселото смеење на жените“.