Ќе се продолжи ли мандатот на „сините шлемови“ на Кипар

Никозија/Њујорк, 30 јули 2014 (МИА) - Советот за безбедност на ОН денеска треба да одржи седница посветена на продолжување на мандатот на Набљудувачката мисија на Светката организација на Кипар за уште шест месеци, објави кипарскиот весник на грчки јазик „Филелефтерос“.

Членовите на Советот за безбедност ги подржаа преговорите за решавање на проблемот со етнички поделениот остров, како и заедничката декларација на лидерите на двете кипарски заедници, усвоена на 11 февруари оваа година и искажаа поддршка за што е можно поскоро постигнување на сеопфатно решение за кипарскиот проблем.

Мировната мисија на ОН во Кипар започна во 1964 година, со цел да се спречат судири меѓу припадници на грчката и турската заедница на островот. Со Мисијата раководи Норвежанката Кристин Лунд, која под своја команда има околу илјада „сини шлемови“.