Тројца работници загинаа при изградба на тунел на ХЕЦ Тирана, 31 јули 2014 (МИА) - Тројца работници загинаа синоќа во Албанија во еден од тунелите во изградба на хидроцентралата „Ќаф Мол“ кај Решен во источниот дел од земјата, јави дописникот на МИА од Тирана.
Според полицијата, несреќата се случила околу 21 часот, кога одеднаш дошло до лизгање на земјиштето и врз работниците паднал голем одрон. Животот на самото место го загубиле двајца албански и еден турски државјанин. За несреќата надлежните ги известил друг работник, кој се здобил со полесни повреди. Несреќата се случила на длабочина од 1.500 метри под земја.
Изградбата на оваа ХЕЦ почна пред две години, откако претходната влада даде концесија на турска фирма.
|