Приштина, 29 август 2014 (МИА) - Косовската претседателка Атифете Јахјага оцени синоќа дека одлуката на Уставниот суд е „задолжителна за сите“ бидејќи гарантира кредибилен и праведен процес.
Уставниот суд го оцени за неважечки изборот на Иса Мустафа на 17 јули за претседател на косовското Собрание, а Јахјага, според зборовите на нејзиниот портпарол, ги повикала пратениците да најдат решение за конституирање на институцијата која ги претставува интересите на косовските граѓани кои ги бирале.
- Демократската култура и политичката зрелост ќе придонесат за намалување на тензиите кои можат да се рефлектираат и на граѓаните на Косово кои покажаа смиреност, зрелост и достоинство за време на целиот процес, порача Јахјага.
Медиумите оценуваат дека изјавата на Јахјага доаѓа како реакција на протестите на активистите на Самоопределување пред Уставниот суд и најавите дека за одбрана на демократијата ќе користат и поинакви начини на протести.