Приштина, 18 септември 2014 (МИА) - Косовската претседателка Атифете Јахјага денеска одржа консултации со претставници на парламентраните партии по неуспешниот избор на кандидатот на Демократската партија на Косово (ПДК), Арсим Бајрами за претседател на косовскиот Парламент.
Јахјага разговараше со лидерот на ПДК Хашим Тачи и раководството на партијата за изнаоѓање на можно решение за деблокада на изборот на претседател на Парламентот.
По состанокот, потпретседалот на ПДК Хајредин Кучи изјави дека неговата партија ќе биде конструктивна во натамошниот тек на формирање на косовските институции и оти ќе ја почитува волјата на граѓаните и одлуката на Уставнот суд.
По состанокот со Тачи, претседателката на Косово разговараше и со лидерот на листата „Српска“, Александар Јаблановиќ. Тој по состанокот изјави дека за текот на разговорот јавноста ќе ја информира Јахјага.
Јахјага имаше состанок и со лидерите на коалицискиот блок Демократски сојуз на Косово (ЛДК) - Алијансата за иднината на Косово (ААК) - Иницијатива за Косово и Самоопределување.
Пратениците на денешното продолжение на конститутивната седница не го избраа Бајрами за претседател на Парламентот. „За“ него гласаа 44 пратенци, додека 61 се изјаснија „против“, а 11 беа воздржани.