Тирана,19 септември 2014 (МИА) - Првите луѓе на албанската полиција тврдат дека не постои ни најмал ризик во врска со посетата на папата Франциско на Тирана,на 21 септември.
Како што изјави Артан Диди, директор на албанската полиција по средбата со министерот Саимир Тахири, безбедноста на Папата е загарантирана.
- Нема ништо лошо поради што се сретнавме со министерот Тахири. Беа само неколку итни нешта, во размена на информации, зашто уште два дена има за подготовка во врска со посетата на Папата, изјави Диди.
Како што претходно јавија странските медиуми, постојат закани по животот на Папата од страна на исламската држава на Сирија и Ирак. Поради тоа по барање на странските тајни служби една од мерките која е веќе преземан од страна на албанската полиција е постојан надзор на 35 лица повратници од боиштата од Сирија, како и 70 семејства, во повеќе градови во Албанија, на лица кои сеуште се на боиштата во Сирија и Ирак.
Папата в недела во 9 часот ќе пристигне на тиранскиот аеродром, а во 11 часот ќе одржи свечена миса на плоштадот „Мајка Тереза “, на која ќе учествуваат и двајца кардинали, 18 епископи, 240 свештеници, 10 семинаристи и четворица ѓакони.