Приштина, 2 октомври 2014 (МИА) – Иако продолжението на конститутивната седница на косовскиот парламент, што требаше да се одржи денеска, беше одложено, пратениците од постизборната коалиција сепак се најдоа во собраниската сала.
На собраниската говорница се појави Иса Мустафа, лидер на Демократскиот сојуз на Косово, кој упати критики до највозрасната пратеничка Флора Бровина, која раководи со седниците.
-Одлуката на Уставниот суд и опструкцијата на Демократската партија, преку Флора Бровина ја уништуваат демократијата во земјава. На оваа земја и е потребен парламентаризам и демократија, -рече Мустафа.
Освен незадоволство од ваквиот чин тој објасни зошто сепак се тука.
-Овдека сме за да го искажиме нашето незадоволство од ваквата состојба, без да се конситуира Парламентот. Ќе бараме наредната седница да се одржи најдолго до средината на наредната недела, -нагласи Мустафа.
По Мустафа на говорницата се појави и лидерот на движењето „Самоопределување“ Албин Курти.
-Наредната недела заедно ќе ја продолжиме работата во нашите инситуции, -рече Курти.
Освен пратениците од овие две партии присуствуваа и на Алијансата за иднината на Косово на Рамуш Харадинај и Иницијативата за Косово, на Фатмир Лимај, кои се дел од постизборната коалиција. Не присуствуваа оние од Демократската партија на Хашим Тачи и пратениците од малцинствата.