Вашингтон, 21 октомври 2014 (МИА) - САД ја поздравија одлуката на Турција да го одобри преминувањето на ирачките Курди преку нејзина територија кон сирискиот град Кобане, кој околу еден месец е опколен од џихадистите на групата Исламска држава.
- Ја поздравуваме изјавата на турското Министерство за надворешни работи, изјави портпаролката на Стејт департментот, Мари Харф на прес-конференција.
Турција вчера ја промени својата стратегија кон Сирија, објавувајќи дека во иднина ќе им дозволува на единиците на силите на ирачките Курди, Пешмерга, да минуваат преку нејзина територија за да стигнат до Кобане, каде учествуваат во одбраната на градот.
И покрај притисокот од своите сојузници, турската Влада досега одбиваше секаква воена интервенција за помош на курдските борци во Сирија, кои веќе еден месец му се спротивставуваат на напредувањето на групата Исламска држава.