Загреб, 27 октомври 2014 (МИА) - Хрватскиот претседател Иво Јосиповиќ смета дека раширената недоверба на хрватското општество во капитализмот, е една од причините зошто сите досегашни влади немале волја во спроведувањето реформи неопходни за модернизација на економијата и воведување ред во јавните финансии, јави Танјуг.
Според него, една по друга влада пропуштиле да спроведат економски реформи кои би привлекле странски инвестиции, би отвориле нови работни места и би ја извлекле земјата од рецесија, која лесно може да се продолжи и во 2015, седма година по ред.
- Најголемата пречка во реформите е во нашите глави. Кога и да се појави некој како значаен вложувач, во општеството доаѓа до реакции дека тој доаѓа тука за да оствари профит, а ние тоа не смееме да го дозволиме, изјави Јосиповиќ во интервју за лондонскиот весник „Фајненшел тајмс“.
Тој појасни оти тоа веројатно е „наследство од поранешниот политички систем - социјализмот“.
Јосиповиќ рече дека тој пристап е видлив и во медиумите и меѓу политичарите, и оти постои раширен страв од инвеститори и претприемачи.