Турско-сириската граница во реонот на Кобане се уште затворена за сириските бегалци

Анкара, 28 јануари 2015 (МИА) - Турско-сириската граница во реонот на  сирискиот град Кобане е се уште целосно затворена, два дена по прогласената победа на сириските курдски сили врз џихадистите.

- Ние не дозволуваме влез на ниту еден бегалец до нова наредба, истакна одговорен претставник на турската Дирекција за управа при катастрофи и вонредни состојби, кој побара анонимност.

Турските власти распоредија голем број претставници на жандармеријата и војници околу граничниот пункт на неколку километри од Суруч, Југоисточна Турција, за да спречат секакви обиди за преминување на границата.

Вчера турската полиција употреби солзавец за да ги запре луѓето, кои се обидуваа да ја преминат турско-сириската граница и да влезат во сирискиот курдски град Кобане, откако курдските сили ги потиснаа борците од Исламска држава, кои го држеа градот под опсада четири месеци.