Претседателството на БиХ ја усвои изјавата за европскиот пат

Сараево, 29 јануари 2015 (МИА) - Членовите на Претседателството на БиХ Младен Иваниќ, Драган Човиќ и Бакир Изетбеговиќ денеска потпишаа заедничка изјава за европската определеност и неопходните реформи на БиХ на патот кон ЕУ, јави Танјуг.

Во изјавата се наведува дека членството во ЕУ е стратешка цел на БиХ и се поздравува обновениот пристап на ЕУ кон БиХ, во согласност со заклучоците на Советот за надворешни работи на ЕУ од 15 декември минатата година.

Потписниците се обврзуваат дека институциите на власт во БиХ ќе ги спроведат сите реформи неопходни за да се воспостави институционална функционалност на сите нивоа на власта и да се овозможи БиХ да се подготви за идно членство во ЕУ како суверена држава.

Ќе биде спроведена програма за иницијални реформски мерки, економско-социјални, за изградба на функционални пазарни економии, јакнење на владеењето на правото, за забрзување на процесот на помирување, унапредување на функционалноста на институциите.