Могерини: Директните контакти на косовскиот и српскиот премиер се позитивен чекорПриштина, 26 март 2015 (МИА) - Високата претставничка на Европската унија за надворешна политика и безбедност Федерика Могерини денеска во Приштина изјави дека договорите постигнати во рамките на дијалогот со Белград треба да се применат во пракса.
- Самиот факт дека косовскиот премиер Иса Мустафа има директен контакт со српскиот премиер Александар Вучиќ е позитивен чекор во таа смисла, истакна Могерини на заедничката прес-конференција со Мустафа.
Таа посочи дека и покрај постигнатиот напредок, има уште многу задачи за решавање.
- Примената на договореното е најтешко, наведе Могерини, при тоа додавајќи оти се надева дека дијалогот Белград-Приштина, што се води со посредство на ЕУ, ќе продолжи.
Таа истакна и дека очекува косовскиот Парламент да изгласа формирање на Специјален суд за воени злосторства во Косово.
Високата претставничка на ЕУ потенцира дека оваа година ќе биде важна за Косово и оти најверојатно Приштина в лето ќе потпише со ЕУ, Договор за стабилизација и асоцијација.
Мустафа посочи дека Приштина сака „посилно присуство на Косово во ЕУ и посилно присуства на ЕУ во Косово“.
Могерини утре ќе го посети Белград каде е предвидено да се сретне со српскиот претседател Томислав Николиќ, со премиерот Вучиќ и со министерот за надворешни работи Ивица Дачиќ.
|