Луксембург, 20 април 2015 (МИА) - Во Европската унија постои внимателен оптимизам кон Босна и Херцеговина и земјата тоа треба да го искористи за конечно да тргне кон европските интеграции, се наведува во заклучокот на работниот состанок на министрите од ЕУ, што се одржа во Луксембург.
Како што јави ФЕНА, хрватската министерка за надворешни и европски работи Весна Пусиќ пред редовниот состанок на шефовите на дипломатиите на земјите-членки на ЕУ организираше работен појадок наречен „Пријатели на БиХ“, на кој учествуваа дваесетина министри, како и високата претставничка за надворешна политика Федерика Могерини и еврокомесарот за соседска политика и проширување Јоханес Хан.
- Ако во една реченици би можел да се опише состанокот тогаш ќе кажам - внимателен оптимизам. Ваков состанок во овој формат никогаш не е одржан не само за БиХ, туку ни за која било земја од регионот, истакна Пусиќ.
Таа додаде дека Велика Британија и Германија сто отсто ја поддржуваат БиХ во нејзините евроинтеграции.
Пусиќ посочи и дека на состанокот се разговарало и за финансискиот пакет што БиХ може да го добие во замена за реформите.