Рига, 22 мај 2015 (МИА) - Синоќешната средба меѓу грчкиот премиер Алексис Ципрас, германската канцеларка Ангела Меркел и францускиот претседател Франсоа Оланд се одржа во „конструктивна клима“, соопштија грчки владини извори.
Како што јави дописникот на МИА од Атина, тројцата лидери се согласиле дека е постигнат значителен напредок и се фокусирале на отворените прашања.
Според истите извори, грчкиот премиер говорел за перспективата на земјата за излез од кризата, ако се постигне долгорочен договор. Од своја страна, Меркел и Оланд, истакнале дека тие ја разбираат потребата од таков договор и изразиле подготвеност да помогнат, дури и лично, за наскоро да се постигне договор.
Ципрас денеска ќе се сретне и со претседателот на Европската комисија Жан-Клод Јункер со кого ќе разговара за текот на преговорите со кредиторите.