Над 300 трговци ќе изложат производи на кавадаречкиот панаѓур

Кавадарци, 6 октомври 2015 (МИА) - Над 300 трговци ќе изложат производи на кавадаречкиот панаѓур кој во петок, сабота и недела ќе се одржи во Кавадарци. Како што информираа денеска од кавадаречката Локална самоуправа, традиционално, останува истата локација на која секоја година трговците ги поставуваат своите тезги.

-Стопанско туристичката и културна манифестација ќе се случува на булеварот „Никола Минчев“, поранешен „Едвард Кардељ“, на потегот од кружниот тек кај новата автобуска станица, до спојот со „Северен Булевар“, соопштија од Службата за односи со јавноста при општина Кавадарци.

Од Локалната самоуправа нагласија дека жителите на булеварот „Никола Минчев“ до четврток, 8 октоври, најдоцна до 12:00 часот, треба да ги отстранат своите автомобили од местото каде што ќе се постават панаѓурските тезги.

-Ги информираме граѓаните дека булеварот „Никола Минчев“ како и булеварот „Македонија“ од спојот со улицата „Орце Николов“ до булеварот „Цветан Димов“ ќе бидат целосно затворени за сообраќај во деновите на одржувањето на есенскиот панаѓур, соопштија од Службата за информирање.

Оттаму кажаа дека предвидено е поставување на санитарен јазол и вода за пиење за корисниците на продажниот простор, со цел да бидат поштедени околните подруми на зградите и другите објекти, кои и покрај желбата на организаторот, секоја година страдаат од несовесните или помалку внимателните посетители на панаѓурот.