Скопје, 9 октомври 2015 (МИА) - Преку аеродромите „Александар Велики’’ во Скопје и „Св. Апостол Павле’’ во Охрид во првите девет месеци годинава патувале 1.183.728 патници, што е зголемување за 20 проценти во однос на истиот период лани.
Од јануари до септември годинава на двата аеродроми се реализирани 11.695 летови, при што порастот на годишно ниво е 10 проценти, информира денеска од „ТАВ Македонија’’, компанијата која оперира со македонските аердороми.
- За разлика од аеродромите во Европската Унија, каде што во август просекот за пораст на бројот на патници е 5,2 проценти, ние бележиме пораст од 30 проценти на скопскиот и охридскиот аеродром во септември, споредено со истиот месец лани, вели Зоран Крстевски, генерален директор на ТАВ Македонија.
Зголемувањето на бројот на патници, наведува Крстевски, е резултат на маркетинг-политиките на ТАВ-холдингот за привлекување нови авиокомпании и зголемување на постоечките фрекфенции од македонските аеродроми. - Истовремено, од голема помош за континуираниот пораст на вкупниот сообраќај е и поддршката на Владата за нискобуџетните авиокомпании, како и се почестото присуство на странски туристи во Македонија, нашите иселеници кои почесто ја посетуваат татковината, како и младите луѓе кои сакаат да патуваат и откриваат нови дестинации, изјави Крстевски.
Во последно време, посочи, значително е зголемен и интересот на граѓаните од соседните земји, како од Косово, од Албанија и од Србија, за патување преку скопскиот аеродром „Александар Велики’“, што навестува негово позиционирање како главен центар меѓу аеродромите во регионот.
Крстевски информира дека се во тек преговори со најголемиот турооператор во Европа „Томас Кук“ за чартер летови од идното лето во Охрид. Можноста за влез на Хрватска во шенген зоната идната година, според Крстевски, остава простор за поголем прилив на туристи во балканските држави.
Од ТАВ Македонија велат дека очекуваат трендот на зголемување на сообраќајот на аеродормите во Скопје и во Охрид да продолжи и натаму, како резултат на новите осум линии кои се воведоа годинава, односно шест од Скопје за Женева, Фридрихсхафен, Осло, Барселона, Хамбург и Нинберг, и две од Охрид за Лондон и за Базел.
Според податоците на ТАВ Македонија, најфрекфентна дестинација од „Александар Велики“ и натаму е Истанбул со 14,4 проценти пазарен удел во вкупниот сообраќај, по што следуваат следуваат Цирих, Виена, Малме, Базел и Лондон. Од јанаури до септември годинава најголем број патници превезла авиокомпанијата „Виз Ер“ која е со 49 проценти пазарен удел, шп која следуваат „Туркиш ерлјанс“, „Аустриан ерлајнс“, „Пегасус ерлајнс“, „Ер Србија“ и „Еделвејс“.