СДСМ: Неприфатлив буџетот на Град СкопјеСкопје, 24 ноември 2015 (МИА) - За советничката група на СДСМ и коалициските партнери е неприфатлив буџетот на Град Скопје за следната година на чиј текст поднесе амандмани. Бараат оставка на градоначалникот на Скопје Коце Трајановски затоа што сметаат дека не работи во интерес на граѓаните, како и нови избори за градоначалник.
Дамјан Манчевски, координатор на советничката група на СДСМ во Советот на Град Скопје, денеска изјави дека со изготвениот буџет главниот град ќе продолжи да се задушува во загаден воздух и ќе нема нови училишта, гасификација и бесплатен јавен превоз за студентите секој ден.
Со буџетот на Град Скопје, како што рече Манчевски, „за нови барокни фасади ќе бидат потрошени нови 5,7 милиони евра, за нови плоштади и фонтани три милиони евра, за одржување на фонтаните и спомениците 500 илјади евра, за Градската куќа 2,6 милиони евра, 500 илјади евра за пристапни површини околу седиштето на ВМРО-ДПМНЕ“.
Со поднесените амандмани советничката група на СДСМ бара повеќе пари за реконструкции на училишни згради, за надвозници и пешачки мостови, велосипедски патеки, субвенции за велосипеди за граѓаните, мерки за намалување на загаденоста на воздухот, повеќе паркови и зеленило, гасификација на средните училишта, информира Манчевски.
|