Николовски: Тендери за „Трансмет“ преку МЗШВСкопје, 5 февруари 2016 (МИА) - Дополнителниот заменик-министер за земјоделство Љупчо Николовски денеска изјави дека фирмата „Трансмет“ добила тендери во вредност од четири милиони евра преку Министерството за земјоделство, шумарство и водостопанство.
- Покрај тоа што половина милион евра за чистење на канали завршиле кај „СилексНеметали“, покрај тоа што 700.000 евра завршиле кај „Трансмет“ денеска објавуваме докази дека нови четири милиони евра завршиле кај фирмата „Трансмет“, чиј сопственик е Сеад Кочан, рече Николовски.
Тој презентираше документи за, како што наведе, договор од 16 јули 2014 година со кој „Трансмет“ добила тендер од над 184 милиони денари за изградба на пристапен пат за брана „Речани“ на Оризарска река, Кочани, како и за договор за близу 57 милиони денари, склучен на 27 август лани за санација на брана Пишица-Пробиштип, за потребите на Управата за водостопанство.
Според Николовски, преку Министерството за земјоделство, наместо за земјоделците, милиони евра, пари на граѓаните, завршуваат во медиуми „коишто шират невистини и ги лажат граѓаните“.
|