Обезбедени финансии за изградба на инфраструктура во Индустриска зона 8 во Неготино

Неготино, 12 февруари 2016 (МИА) - Владата на Република Македонија  обезбеди финансиски средства за изградба на инфраструктурата во Индустриската зона 8 во Неготино, информираше денеска градоначалникот на Неготино Ванчо Апостолов.

- Всушност, Владата обезбеди финансии во висина од околу 180.000.000 денари за реализација на 28 проекти доставени од Центрите за развој на осумте плански региони во нашата држава, а по објавениот повик за финансирање на проекти за развој на регионите, од кои најголем дел се за инфраструктурни проекти, рече градоначалникот.

Апостолов појасни дека во  Вардарскиот плански регион ќе се финансира изградбата на инфраструктурата во индустриските зони во Неготино и во Велес.

- Имено, за уредување на 2 зони во Неготино и Велес обезбедени се вкупно 300.000 евра, со тоа што дел од овие средства ќе бидат наменети за изградба на инфраструктурата во Индустриската зона 8 во Неготино, додаде градоначалникот Апостолов.