Струмичките фармери на Саем за вино во БугаријаСтрумица, 12 февруари 2016 (МИА) - Стотина земјоделци од Струмица беа гости на Саемот за вино што минатиот викенд се одржа во Мелник, Бугарија. Собирање меѓународно искуство за производство и третман на грозје, како и создавање вино според европски стандарди, беа дел од целите на едукативната посета која им ја организираа од Здружение на земјоделци „Хорти еко“.
- Македонското вино е подобро, но бугарското произведено во Мелник важи за најдобро кај нашиот сосед. Нашите фармери тука имаа комплетна можност да го видат начинот како се произведува и чува виното на нивните бугарски колеги. Запознавањето со голем број производители на вино и грозје беше можност плус да се споделат и надградат досегашните сознанија и искуства, вели Томе Тимов, претседател на Здружението на земјоделци „Хорти еко“ од Струмица.
Струмичките производители велат дека последниве години со новите технологии на производство стануваат конкурентни на бугарските.
- На саемов доаѓам првпат. Секогаш е добро меѓународното гостување и претставување. Особено беше интересна посетата на Музејот на виното. Тоа покажува како треба да се почитува оваа земјоделска гранка која е особено значајна и во нашата држава, вели Војо Катранџиев, земјоделец.
Гостувањето во Мелник, земјоделците го искористиле и за промоција на туристичката карта на Струмица и на регионот. Велат дека југоистокот има многу да покаже и да понуди на потенцијалните туристи од Бугарија.
|