ССМ најавува кампања за мобилизирање ново членство

Скопје, 28 април 2016 (МИА) - Сојузот на синдикатите на Македонија (ССМ) ќе го прослави Меѓународниот ден на трудот, 1 Мај, со почнување кампања за организирање и мобилизирање ново членство.

Како што најавува во денешниот Првомајски проглас, кампањата ќе се реализира во текот на целата година, а ќе биде фокусирана и на зачленување во синдикатите на неорганизираните работници, давање институционална можност за остварување колективна заштита и обезбедување социјална правда, социјална инклузија, солидарност и колективно обезбедени работнички права

ССМ, стои во Прогласот, и оваа година ќе бара вклучување во сите процеси кои водат кон унапредување на социјалниот дијалог, повеќе и подобри работни места спроведување индустриска демократија, унапредување на информирањето и конслутирањето, учество во економското управување, унапредување на процесот на колективно преговарање и договарање, обезбедување услови за здрави и безбедни работни места, сигурни и зголемни плати, економска и родова еднаквост и обезбедување на збогатени социјални права и стандарди за сите работници.

- И оваа година ќе бараме од сите социјални партнери збогатување на социјалниот дијалог, унапредување на колективното преговарање преку зајакнување на институционалната рамка во Законот за работните односи, како и потпишување и имплементирање протокол за социјален напредок, се наведува во Прогласот.

Сојузот на синдикатите на Македонија им го честита празникот на сите работници и граѓани на Република Македонија во името на, како што наведува, историската традиција и борба за обезбедување социјална правда и индустриска демократија, повикувајќи се на потребата од се поголема социјална инклузија, еднаквост, рамноправност, политичка, етничка, верска и национална толеранција, економски раст и развој на работничките права.

- Први мај е ден кога ја славиме историската борба на работниците за подобри работнички права, посигурни работни места, подобра и посигурна социјална и економска положба на нив и нивните семејства, пишува ССМ во Првомајскиот проглас.