Работна средба на министерот Кучи со директорот на МЕПСО СпасовСкопје, 26 мај 2016 (МИА) - Претставување на состојбите на актуелните заеднички проекти и утврдување на динамиката за нивна реализација беше цел на денешната работна средба меѓу министерот Дритон Кучи и генералниот директор на АД МЕПСО Синиша Спасов што се реализира на иницијатива на министерот за економија.
Директорот на МЕПСО Спасов, информираат од Кабинетот на Кучи, го запознал министерот со проектите кои се реализирани, но ги презентирал и тековните активности на државниот електропреносен систем оператор, како и проектите кои се планирани за идниот период, а се однесуваат на изградба на интерконективни далеководи со Албанија и Косово и другите земји. Тема на разговор биле и активностите за реконструкција на постоечките и изградба на нови далеководи на територијата на Македонија.
Кучи и Спасов ставиле акцент и на подготовките на самитот во Париз, особено во делот на меките мерки во делот на електриката, прекуграничното балансирање и другите обврски што произлегуваат од членството на Македонија во енергетската заедница.
|