Шпаркасе банка доби согласност да стекне акции во Македонска берза и Централен депозитар

Скопје, 26 мај 2016 (МИА) - Комисијата за хартии од вредност (КХВ) на Република Македонија денеска на „Шпаркасе банка" ад Скопје и даде согласност за стекнување квалификувано учество во „Македонска берза" ад Скопје и во „Централниот депозитар за хартии од вредност" ад Скопје, чиј вкупен кумулативен износ не надминува 20 проценти од вкупно издадените акции со право на глас од двете акционерски друштва.

Како што соопшти по седницата КХВ, согласно одлуката за купување, „Шпаркасе банка" ад Скопје има намера да стекне 278 обични акции од „Македонска берза" ад Скопје што претставува 9,95 проценти од акционерскиот капитал на берзата и 842 обични акции од „Централниот депозитар за хартии од вредност" ад Скопје, односно 14,03 проценти од акционерскиот капитал на депозитарот.

КХВ укажува дека доколку „Шпаркасе банка" ад Скопје ја реализира намерата и ги купи акциите, заедно со оние што претходно ги  поседува, вкупно би имала 15,97 проценти од акциите на „Македонска берза" ад Скопје и 19,98 проценти од акциите на „Централниот депозитар за хартии од вредност" ад Скопје.

На седницата на Комисијата за хартии од вредност е издадена една дозвола за инвестициски советник.