Пристаништето во Драч како алтернатива за македонските бизнисмениСкопје, 1 јули 2016 (МИА) - Пред македонските бизнисмени денеска беа презентирани можностите што ги нуди албанското пристаниште во Драч кое покрај Солунското пристаниште може да се користи за транспорт на стоки.
Презентацијата беше организирана од страна на Стопанската комора на Македонија со цел на бизнисмените да им се понудат и други алтернативи за транспорт на стоки покрај Солунското пристаниште на кое неодамна имаше штрајк, а македонските компании поради тоа претрпеа загуби.
- Целта е во услови кога имавме континуирани блокади, штрајкови и нефункционирање на Солунското пристаниште да се отворат и други можности за компаниите и да им се понудат најновите услови што ги нудат другите пристаништа, рече Билјана Пеева - Ѓуриќ од Стопанската комора на Македонија, додавајќи дека Драч е второто најблиско пристаниште за потребите на македонското стопанство.
Директорот на пристаништето во Драч, Газменд Шалси, кој присуствуваше на презентацијата во Скопје, рече дека нивната цел е да го вратат ова пристаниште како едно од главните во регионот.
- Пристаништето во Драч географски и економски е доволно добро развоено и има добра положба така што отвора можности да му конкурира на пристаништето во Солун. Имаме три знајачни проекти, односно продлабочување на базенот на пристаништето, поврзување на пристаништето со железница и отворање на т.н. суво пристаниште, истакна Шалси.
Пристаништето во Драч е една од најстарите пристаништа во регионот и најголемо во Албанија. Се наоѓа на долниот дел на брегот на Јадранското Море. Оддалеченоста од главниот град на Албанија е 35 км, а од аеродромот „Мајка Тереза“ е 25 км. Пристанишната Капетанија Драч има четири терминали - терминал за траекти, источен терминал, терминал за контејнери и западен терминал. Пристаништето работи 24 часа цела година.
|