Се реновира училиштето во кочанско Горни ПодлогКочани, 25 јули 2016 (МИА) - Со грант од Владата на Јапонија во висина од 70.479 евра, Општина Кочани започна со реновирање на зградата на Подрачното основно училиште „Св. Кирил и Методиј“ во село Горни Подлог.
Реконструкцијата на училиштето вклучува целосна замена на кровот, нова фасада, делумна обнова на подот и замена на вратите и прозорците, со што значително ќе се подобри енергетската ефикасност на објектот.
- Влагата во училишната зграда во Подлог се зголеми по поплавите во февруари 2015 година, па реконструкцијата е добредојдена. За реализација на градежните активности го користиме летниот распуст на учениците. Овој проект ќе обезбеди модерна енергетски ефикасна зграда со поквалитетни услови за работа и учење, соопшти градоначалникот на Општина Кочани, Ратко Димитровски.
Договорот за одобрување на средствата беше потпишан на почетокот на март во Јапонската канцеларија за врски во Скопје, по што Општина Кочани како носител на проектот, ги презема активностите за реализација на градежните работи,кои се очекува да завршат пред почетокот на новата учебна година.
Училиштето во Горни Подлог работи во состав на ОУ„Св Кирил и Методиј“ од Кочани и е објект изграден пред 50 години, во кој посетуваат настава 130 ученици од прво до деветто одделение од селата Горни Подлог, Долни Подлог и Мојанци.
|