Мукоски: Еврообврзницата издадена во согласност со законите и прописите

Скопје, 25 јули 2016 (МИА) - Пратеничката група на ВМРО-ДПМНЕ денеска на прес-конференција истакна дека еврообврзницата е издадена во согласност со сите законски норми и прописи во Република Македонија.

- За жал и денес, СДСМ се обидува да шпекулира и манипулира со македонските граѓани иако добро знаат кога и на кој начин министерот за правда го изразува своето мислење односно на денот на доспевање на средствата што се позајмени од еврообврзницата и легнување на сметката на Народна Банка, министерот за правда го става својот потпис. Сепак, ова е една традиција и обид за шпекулација од страна на СДСМ со граѓаните на Република Македонија, рече на прес-конференција пратеникот Крсто Мукоски.

За јавноста, како што кажа, средствата од еврообврзницата ќе бидат искористени за буџетска поддршка.

- Добар дел од средствата ќе биде искористен за продолжување на капиталните инвестиции и еден дел од средствата, околу 180 милиони, ќе бидат за враќање на стари долгови, рече Мукоски.

Што се однесува до ребалансот на Буџетот, Мукоски со став дека е во добра кондиција, има средства за сите неопходни исплати и за плати и за пензии и за социјални трансфери.

- Генерално, намалени се ставките за некапиталните расходи односно ставката на стоки и услуги и еден дел од капиталните расходи во оние проекти кои што заради динамиката на изведување не се во можност да се реализираат. Според нашите законски прописи во изминатиов период имавме неколку пати најави за избори и во тој период имаше проблем со реализација на тие капитални проекти и инвестиции, рече Мукоски.

Тој истакна дека сите ревидирања во надолна линија особено на бруто-домашниот производ од 4 отсто на 2,3 отсто се по исклучителна заслуга на деструктивното однесување на СДСМ.