„Македонија вработува 2“ претставен во НеготиноНеготино, 26 јули 2016 (МИА) - Проектот „Македонија вработува” се покажа како еден од најуспешните за отворање на нови работни места, рече синоќа во Неготино Кристина Чадамова, раководител на Агенцијата за вработување во овој град, при претставувањето на проектот пред неготинци.
Таа потсети дека во тек е втората фаза од проектот, која што, како што додаде, дополнително ќе придонесе за намалување на невработеноста, развој на домашните компании, почеток на нови бизниси и економски прогрес на државата.
- На ниво на држава, преку „Македонија вработува 1” поволностите беа искористени од над 10 илјади компании. Во општина Неготино нив ги прифатија над 150 лица. Процесот на нови вработувања продолжува со „Македонија вработува 2”, нагласи таа, наведувајќи ги сите пет мерки со помош на кои до работа можат да дојдат разни категории на лица.
Ги повика компаниите да ги искористат поволностите и финансиската поддршка која ја нуди државата.
Неготино веќе ги има и првите три вработувања преку „Македонија вработува 2”.
|