Василево ќе гради филтер станица за водоводот во ДобрашинциВасилево, 26 јули 2016 (МИА) - Градоначалникот на Општина Василево, Ванчо Стојанов денеска потпиша два договора за реализација на инфраструктурни проекти - изградба на нова филтер станица за водоводот во Добрашинци која ќе ги опслужува и селата Нова Маала, Чанаклија и новата индустриска зона, како и изградба на две улици во населените места Василево и во Седларци.
- Првиот договор го потпишавме со фирмата Хидроинжинеринг како најдобар понудувач. Тие треба да изработат техничка документација за изградба на нова филтер станица за водоводот во Добрашинци. Вториот договор што го потпишавме е со фирмата „Жикол“ која треба да изгради две улици, една од 115 метри во Василево, а другата од 500 метри во Седларци. Проектите се дел од нашите намери за подобрување на инфраструктурата за соодветни услови и квалитетен живот на граѓаните, рече градоначалникот Стојанов.
Тој очекува сите проекти да бидат завршени со крајот на градежната сезона. Локалните власти се надеваат дека подобрената комунална инфраструктура, во делот на водоснабдувањето, канализациската мрежа и добрите патишта ќе помогнат за отворање на новата индустриска зона во која две парцели се наменети за изградба на вински визби, а пет парцели за фотоволтаици.
Градоначалникот Стојанов најави дека утре ќе се одржи и електронската аукција за изградба на пешачка патека покрај населеното место Владевци. Појасни дека пешачката патека ќе биде направена од бекатонски плочки со комплетно осветлување и атмосферско одводнување бидејќи, рече, проблематична е конфугурацијата на теренот кога и при најмали врнежи се собира вода.
Парите за техничката документација за филтер станицата во висина од 500 илјади денари се обезбедени како донација од Министерството за животна средина, а за улиците паричните средства се од локалниот буџет.
|