Стапките на економски раст во Македонија не се на задоволително ниво, оцени дополнителниот заменик министер за финансии Кире Наумов во синоќешната дебата на ТВ Нова каде заедно со министерот за финансии Кирил Миновски се дебатираше за состојбите во македонската економија.
- Освен во 2007 и 2008 година, сите досегашни стапки на раст се на незадоволително ниво, просечната стапка на раст е 3 проценти. Во време на СДСМ стапката беше 3,7. Тврдам дека било кој раст под 5 или 6 проценти за Македонија е неуспех, рече Наумов.
Тој се заложи и за поголема поддршка на домашните компании, со цел да станат поконкурентни на пазарот во однос на странските компании.
- Доколку и македонските фирми добијат ослободување од плаќање данок, од плаќање придонеси, доколку им се помогне околу изведувањето на инфраструктурата и слично тогаш тие ќе можат да направат компетитивен продукт што ќе можат да го продадат на странските инвеститори. Во спротивност, сите давачки што ги имаат македонските фирми ги спречуваат да бидат конкурентни на пазарот во однос на странските компании кои имаат разни поволности и кои можат да ги набават тие прозводи поевтино од странство. Крајниот резултат на таквата состојба ќе биде тоа што на домашните компании ќе им остане само можноста да извршуваат најосновни услуги за странците, како кетеринг или превоз, рече Наумов.