Тирана, 18 февруари 2017 (МИА) - Банките немаат доверба да инвестираат во албанската економија и преферираат своите пари да ги трансферираат надвор од Албанија.
Последните официјални статистички податоци од Централна банка на Албанија покажуваат дека само минатата година банките надвор од земјата трансферирале околу 50 милијарди леки или над 370 милиони евра.
- Ова се само парите пренесени во текот на минатата година, бидејќи вкупната вредност на инвестиците кои банките ги изнеле надвор од земјата достигнува 364,1 милијарди леки или над 2,7 милијарди евра. Ова е 35 проценти од вкупните средства на финансискиот систем и споредено со 2015 година, вкупните инвестиции надвор од земјата се повисоки за 15,3 отсто, пишува весникот „Шќиперија име“.
Според истиот извор, голем дел од парите префрлени во странство се депозити во банки и вложувања во хартии од вредност на странски влади.
- Но, во последните две години албанските банки почнаа да даваат кредити за странски бизниси. Според Централна банката на Албанија, во септември минатата година, кредитите кои албанските банки ги одобриле за странски бизниси достигнале 93,7 милијарди леки, што е 17,2 проценти од вкупните кредити во Албанија, наведува весникот.
Според Централна банка на Албанија, најголемиот дел од овие кредити се дадени за бизнисите во Македонија или Косово.