Скопје, 26 август 2017 (МИА) - Владата предводена од СДСМ покрај враќањето на евтината дневна тарифа на струјата, со којашто на граѓаните им се овозможуваат заштеди и пониски сметки за струја, покрај укинувањето на радиодифузната такса, ги намалува и катастарските трошоци до 50 отсто, рече на денешната прес-конференција потпретседателот на СДСМ Благој Бочварски.
Дополнително, од 1-ви септември, како што рече, ќе стартува укинувањето на двојното плаќање во случај кога некој одбиен предмет по пријава на странка треба по втор пат да се поднесува.
Според него, станува збор за 100 отсто олеснување на граѓаните, деловните луѓе и останатите корисници на катастарски услуги.
- До сега, во случај кога некој предмет по пријава на странка беше одбиен, заради постоење на било каква грешка, независно од било која страна, граѓаните беа принудени при повторното поднесување на предметот по втор пат да ги плаќаат веќе платените такси, рече Бочварски.
Посочи дека намалување на катастарските трошоци ќе има и за другите услуги како што се вадење на историјат, потврда за имотна состојба, промени и запишувања во катастарот на недвижности.
- Истовремено заради децентрализација на услугите и овозможување на полесен пристап и поголема достапност за граѓаните, дел од овластувањата ќе се вратат на геодетските фирми. Очекувањата се дека ќе се зголеми конкуренцијата, а со тоа и квалитетот на услугите што ги добиваат граѓаните, истакна Бочварски.