Прилеп, 16 април 2014 (МИА) - Директор на Јавното претпријатие за урбанистичко планирање Бранко Нешкоски во Приле денеска на прес-конференција најави дека од петок ќе профункционира градскиот сообраќај.
Според Нешкоски, во првата фаза ќе работат три линии со 6 автобуси, кои ќе се вкрстуваат и ќе ги покриваат главните пунктови во градот.
- Се очекува да набавиме уште 4-5 автобуси за нови две линии кои целосно ќе го покријат градот, рече Нешкоски.
За градоначалникот на Прилеп Марјан Ристески ова е исполнувањето на желбата на прилепчани прв пат да добијат организиран градски превоз.
- Линиите ќе почнат да функционираат, целосно да се опфати градот, а потоа ќе ги опфатиме и населените места, зашто Прилеп со Мариово е по површина една од најголемите општини во земјава, рече Ристески.
Билетот за градскиот превоз чини 20 денари, а ќе има попусти за користење дневни, неделни, месечни и годишни билети. Попусти имаат учениците и студентите за кои месечниот билет ќе биде 350 денари, а за граѓаните 600 денари. Неделен билет е 250 денари за неограничено возење. За лицата со посебни потреби градскиот превоз е бесплатен.
Промотивно, за викендот за велигденските празници ќе биде бесплатно возењето со градскиот превоз. Бесплатно ќе биде и идниот викенд за време на вториот круг од изборите.