Започна изградбата на нова атмосферска канализација во Кочани

Кочани, 17 април 2014 (МИА) - Согласно програмата на општина Кочани за комунално уредување започнаа работите на изградбата на нова атмосферска канализација со што ќе се оддели фекалната канализација во неколку реони на градот.

- Работите на почетокот ги започнавме од улицата „Страшо Ербапче“ од каде што потоа ќе се премине на улиците „Тодосија Паунов“ и „Роза Петрова“, кои заедно со улицата „Маршал Тито“ каде што е во завршна фаза изградбата на атмосферската канализација, изјави Ратко Димитровски, градоначалник на општина Кочани.

За овој проект Владата на Република Македонија издвои средства во висина од 1.100.000 евра.Работите ги изведува компанијата „Жикол“ од Струмица и целосното завршување на проектот се очекува за три месеци.