Забрзана динамиката за изградба на спортската сала во ВевчаниВевчани, 21 јули 2014 (МИА) – Интензиво се работи на изградбата на спортската сала во општина Вевчани. Според градоначалникот Цветомир Угриноски, завршени се сите земјени, армирачки, ѕидарско-бетонски работи и изградена е трибината со капацитет од 500 седишта.
- Динамиката на работа се зголемува. Во моментот се работи на челичната конструкција. Очекуваме до почетокот на новата учебна година работите да завршат и спортската сала да биде пуштена во употреба, рече Угриноски.
Спортската сала, нагласи тој, покрај за околу 250-те ученици од основното училиште „Страшо Пинџур“ во Вевчани, ќе ја користат и останатите граѓани, спортисти...
Реализацијата на проектот ќе чини околу 700.000 евра, средства обезбедени од Буџетот на Република Македонија во рамки на проектот „Изградба и опремување на 145 спортски сали“. Изведувач на градежните работи е компанијата „Гранит“ од Скопје.
|