Општина Новаци ќе гради насип на река Елешка на вливот во Црна Река Новаци, 22 јули 2014 (МИА) - Општина Новаци во соработка со ЈП „Битолско поле“ и Регионалниот центар за управување со кризи, а со поддршка на РЕК Битола, ЈП „Македонски шуми“, ЗК „Пелагонија“ и компанијата „Стентон градба“ ќе почне со изградба на насип на река Елешка на самиот влив во Црна Река со цел заштита на земјоделските површини и пумпите од РЕК Битола, инфомираат од Општината.
Градоначалникот Лазар Котевски посочи дека изградбата на насипот ќе се одвива еден месец и оти со интервенцијата ќе биде решен еден долгогодишен проблем на општината кој се јавува при обилни врнежи и поплави.
- Изградбата на насипот чини околу 50 илјади евра и ќе биде заедничка финансиска инвестиција на сите инволвирани страни. Проектот е од голема важност за земјоделските површини кои постојано се поплавуваа во пролетните месеци од напливот на вода по топењето на снегот, но воедно претставуваа и опасност за пумпите кои се тука поставени. Насипот беше пробиен и итно е потребна санација заради превенција и спречување на понатамошни поплави и големи штети, истакна Котевски.
|