Во Велес се гради тротоар помеѓу населбите Тунел и Превалец

Велес, 24 јули 2014 (МИА) - Во Велес во тек е изградбата на бекатонски тротоар во должина од 650 метри помеѓу двете велешки маселби Тунел и Превалец, инвестиција вредна 1 милион и 800 илјади денари обезбедена од општинскиот буџет.

Увид во изведбата на работите денеска направи градоначалникот на Општина Велес,Славчо Чадиев кој потенцира дека со ова во дело го реализира предизборното ветување на жителите од населбата Превалец.

Тој информира дека овој тротоар е дел од градежната програма за општината за 2014 и е од исклучителна важност за жителите од овие населени места.

- Тротоарот е од голема важност бидејќи ќе овозможи безбедно движење на пешаците на овој дел на периферијата на Велес.Запазени се сите процедури и нема никакво одземање од постоечкиот патен коловоз, а со за што сите возила ќе можат непречено да сообраќаат како и досега, потенцира Чадиев.

Градоначалникот Чадиев најави дека во наредниот период ќе го зајакнат и осветлувањето во овој дел од градот, а тим на Општина Велес прави нацрт-проекти за градење на ваков тротоар и на потегот накај реката Бабуна од населеното место Долни Дуќани накај манастирот „Св. Димитрија“.

- Мора да се има предвид и разбирање затоа што тој предел е доста проблематичен и оти патот е регионален, па потребни се поголем број на дозволи, потенцира Чадиев.

Во план се и градењето на велосипедски патеки кон езерото „Младост“ и кон реката Бабуна, затоа што, нагласи тој, велешани овие две локации ги користат за рекреација.