Во населбата Оризари крај Кочани забрзано се работи на изградба на детска градинка Кочани, 1 август 2014 (МИА) - Во населбата Оризари крај Кочани забрзано се одвиваат работите за изградба на просториите на новата детска градинка. Се работи на преадаптација на 200 метри квадратни корисна површина во приземјето на зградата од поранешната општина Оризари, сега сопственост на општина Кочани.
- Детската градинка во Оризари е дел од проектот на Владата на Република Македонија за изградба на 14 детски градинки во руралните средини. Општина Кочани во изградбата на детската градинка учествува со поставување на водоводна, канализациона и електрична мрежа. Останатите трошоци за адаптацијата на просторот кој е сместен во центарот на населбата Оризари, се на товар на Министерството за труд и социјална политика, изјави Ратко Димитровски, градоначалник на Кочани.
Новата детска градинка во која ќе бидат згрижени 50 дечиња од Оризари со работа ќе започне во септември оваа година. Инаку, ова е втора детска градинка во општиона Кочани по онаа која веќе работи во село Бели со капацитет од 30 дечиња.
|