Потпишани договори со четири општини за водоснабдување и фекална канализација

Скопје, 19 август 2014 (МИА) - Министерот за животна средина и просторно планирање Нурхан Изаири денеска потпиша договор со градоначалникот на општина Врапчиште, Бајрам Кадрија за проектот „Фекална канализација на главна улица бр. 101 на населено место сeло Добридол, општина Врапчиште“ (во должина од 620 метри), чија вредност е три милиони денари.

Изаири, соопшти Министерството за животна средина и просторно планирање, потпиша договори и со градоначалникот на општина Липково, Садула Дураки за проектот „Доводен цевковод од акумулација Глажња до филтер станица Липково“ во висина од десет милиони денари, со што ќе се обезбеди квалитетна вода за пиење за жителите на општината, како и со градоначалникот на општина Кичево, Фатмир Дехари за проектот „Регулација и уредување на коритото на големиот поток во село Стрелци, општина Кичево“ чија вредност е четири милиони денари.

Врз основа на Програмата за инвестирање во животната средина и Конкурсот за распределување на средства за финансирање и реализирање на програми, проекти и други активности од областа на животната средина за 2014 година, министерот Изаири на 15 август потпиша Договор со  градоначалникот на општина Желино, Фатмир Изаири за проектот „Изградба на секундарна мрежа за водоснабдување до приклучок за н.м. Стримница, општина Желино“ во висина од три милиони денари, со кој ќе се реши проблемот со водоснабдување на 2.600 жители од тоа населено место, стои во соопштението.