Ќе се отстрануваат пет руинирани објекти во Куманово

Куманово, 20 август 2014 (МИА) - Секторот за урбанизам од општина Куманово поведе постапка за остранување пет руинирани објекти лоцирани во централното градско подрачје, на улиците „Коле Неделковски“, „Димитар Влахов“, „Перо Чичо“ и „Илинденска“, како и на локалитетот „Чоробенско Ќоше“.

Според надлежните, доставени се известувања до сопствениците кои се должни да поднесат итно барање за добивање одобрение за отстранување на објектите.

- До денеска немаме повратна реакција освен од сопствениците на еден објект кои се подготвени за соработка со општината, информира раководителот на Секторот за урбанизам Лидија Ланг Спасовска.

Потребно е да се испочитуваат законските рокови на достава, а подоцна Секторот ќе спроведе постапка, односно ќе издаде одобрение за нивно остранување.

Согласна процедурата, ќе се изготват елаборати за нивно остранување по што ќе се издаде одобрение. Сметките за остранувањето ќе им бидат доставени на сопствениците.

- Доколку не се утврди сопстевникот, тогаш општината од сопстевни средства го врши остранувањето, објасни Спасовска.

На подрачјето на општината има околу 15 руинирани објекти.