Загубите на грчките превозници поради руското ембарго се проценуваат на десет милиони евра

Атина, 20 август 2014 (МИА) - Загубите на грчките превозници поради воведувањето на руското ембарго за увоз на земјоделски производи се проценуваат на десет милиони евра за оваа година, соопшти денеска Федерацијата на грчките товарни превозници.

Федерацијата ја потенцира „исклучително сложената ситуација“ во која се нашле компаниите за меѓународен превоз на товар.

Организацијата нагласи дека загубите поради ембаргото од една страна и одбивањето на Владата и Европската унија да се исплатат комензациите на транспортните компании од друга, ја задушуваат оваа гранка. 

- Поради целосната пропаст на реформите во транспорниот сектор, економската криза, како и поради незаконските превозници дојдовме во ситуација 60 проценти од превозниците да останат без работа или во најдобар случај да работат нецелосно работно време, се наведува во соопштението на Федерацијата на грчките товарни превозници. 

Во соопштението се додава дека со новиот проблем, кој се појави поради руското ембарго, без работа останале уште 300 превозници.